پاکستان اور قطر کا داخلی سلامتی میں تعاون بڑھانے پر اتفاق

دوحہ: پاکستان اور قطر نے داخلی سلامتی کے شعبے میں تعاون بڑھانے اور سکیورٹی شراکت داری کو مزید مضبوط بنانے پر اتفاق کیا ہے۔

وفاقی وزیر داخلہ محسن نقوی اور قطر کے وزیر داخلہ شیخ خلیفہ بن حمد بن خلیفہ آل ثانی کی دوحہ میں ملاقات کے دوران دونوں وزارتوں کے درمیان تعاون اور رابطوں میں اضافے پر تبادلہ خیال ہوا۔ علاقائی صورت حال، امن اور استحکام سے متعلق امور بھی زیر بحث آئے۔

محسن نقوی نے کہا کہ پاکستان اور قطر خطے میں امن و استحکام کے فروغ کے لیے مل کر کام کر رہے ہیں۔ قطری وزیر داخلہ نے پاکستان کے ساتھ تعلقات کی اہمیت پر زور دیا۔ دونوں وزرا نے باہمی دلچسپی کے شعبوں میں تعاون آگے بڑھانے کے عزم کا اعادہ کیا۔