کراچی (نیوز ڈیسک) پاکستان پیپلز پارٹی کے چیئرمین بلاول بھٹو زرداری نے عالمی یومِ اساتذہ پر ملک بھر کے اساتذہ کو مبارکباد دی ہے۔ انہوں نے اساتذہ کی خدمات کو خراج تحسین پیش کرتے ہوئے کہا ہے کہ ان کی محنت پاکستان کے روشن مستقبل کی بنیاد ہے۔
بلاول بھٹو زرداری نے کہا کہ استاد صرف نصاب نہیں پڑھاتا بلکہ شاگردوں میں شعور اور سوال کرنے کی ہمت پیدا کرتا ہے۔ انہوں نے زور دیا کہ اساتذہ کو احترام اور سازگار ماحول فراہم کرنا ریاست کی اہم ذمہ داری ہے۔
چیئرمین پی پی پی نے نجی اداروں کے اساتذہ کی تنخواہوں میں منصفانہ اضافے اور ملازمت کے تحفظ کا مطالبہ کیا۔ انہوں نے کہا کہ تعلیم ہمیشہ ان کی جماعت کی بنیادی ترجیح رہی ہے اور وہ اساتذہ کے حقوق کی جنگ جاری رکھیں گے۔
