اسلام آباد (بیورو چیف) وزیر مملکت داخلہ طلال چودھری نے کہا ہے کہ ملک کو غیر ملکی عناصر سے پاک کریں گے، دہشت گردی کا خاتمہ حکومت کی اولین ترجیح ہے۔ قومی اسمبلی میں اظہارِ خیال کرتے ہوئے انہوں نے کہا کہ نیشنل ایکشن پلان وفاق اور صوبوں کا مشترکہ معاملہ ہے اور وفاق سمیت تمام صوبے اس پر عمل کر رہے ہیں۔
طلال چودھری نے کہا کہ سکیورٹی سے متعلق ہر اجلاس کا پاکستان تحریک انصاف نے بائیکاٹ کیا۔ دہشت گردی کے خاتمے کے لیے سیاسی جماعتوں کو بھی اپنا کردار ادا کرنا چاہیے، جبکہ سکیورٹی فورسز ملک سے دہشت گردی کے خاتمے کے لیے پُرعزم ہیں۔
وزیر مملکت داخلہ کا کہنا تھا کہ جعلی شناختی کارڈ بنانے والے نادرا افسران کو ملازمت سے نکال دیا گیا ہے۔ انہوں نے کہا کہ ملک کو غیر ملکی عناصر سے پاک کرنا اور شہریوں کا ریکارڈ شفاف رکھنا ضروری ہے۔
طلال چودھری نے واضح کیا کہ خیبرپختونخوا کے لوگوں کے پاسپورٹ روکنے کی بات درست نہیں۔ ان کے مطابق وہ ایک ایک پاسپورٹ کی تفصیل دینے کے لیے تیار ہیں۔ انہوں نے کہا کہ دہشت گردی کے مکمل خاتمے کے لیے سیاسی اور حکومتی سطح پر مشترکہ کوششیں ضروری ہیں۔
